Paprikur

Bell Peppers

Paprika er af náttskuggaætt . Af öðrum nytjaplöntum úr sömu ætt má t.d. nefna kartöflur, tómat og eggaldin.

Algengustu afbrigði hér á landi eru Ferrari sem er gefur græn aldin sem verða rauð þegar þau eru fullþroskuð, Bossanova sem gefur aldin sem fullþroskuð verða gul en eru græn fyrst og Boogie en aldin þess afbrigðis verða appelsínugul þegar þau eru fullþroskuð.

Venjan er að planta út þegar fyrsti knúppur er vel sýnilegur en áður en hann opnast.Plantað er út í jarðveg, torfmottur, steinullarmottur eða í vikur og líkt og í tómötum er plantan bundinn upp í víra eftir útplöntun.

Aldinið er uppskorið þegar það hefur tekið endanlegan lit en ef uppskorið er grænt verður aldinið að vera fullþroskað, stint og vel grænt. Það tekur aldinið um 8 vikur að verða fullþroskað og 3 vikur frá því að það er tínsluhæft grænt þar til það er orðið fullþroskað og komið með endanlegann lit.

Lesa meira

Geymsla

Geymsluþol papriku er nokkuð mismunandi, grænar paprikur geymast betur. Besti geymsluhiti fyrir pakrikur er 15-18°C. Ef paprika er geymd í of miklum kulda þá linast hún fyrr.

Notkun

Paprikan er skoluð og stilkurinn, himnur og fræ fjarlægt (himnur og fræ eru nokkur bragðsterk). Síðan má skera hana í hringi og hafa sem álegg ofan á brauð, á ostabakkann eða salat. Einnig má hreinsa innan úr aldinunum, fylla þau með kjöthakki eða öðru góðgæti. Mjög gott er að grilla papriku á útigrilli. Mikið af uppskriftum innihalda papriku.

Má frysta paprikur ?

Já, það tekst oftast vel. Skolið aldinin, skerið þau í tvennt og fjarlægið himnur og fræ. Skerið þau síðan niður í þunnar sneiðar eða litla teninga til að nota síðar í heita rétti eða salat.

Neyta þarf paprikunnar skömmu eftir að hún þiðnar því hún verður fljótlega vatnskennd ef hún hefur verið fryst. Einnig má skera aldinin í tvennt eftir að þau hafa verið hreinsuð og frysta í heilu lagi. Setjið fyllingu í hana fyrir frystingu eða um leið og aldinin eru tekin út og setjið beint í heitan ofn.

Hvaða hluta er hægt að borða ?

Allt er ætt nema stilkurinn, himnurnar og fræin, það er fjarlægt fyrir notkun.

Næringartafla

Ætur hluti 85 %
Innihald í 100 g
Vatn 91 g
Orkurík efnasambönd
Prótein 1.3 g	Trefjar 0.9 g
Kolvetni 6.6 g	Fita 0.5 g
kj 151	kcal 36
Steinefni
Járn 0.5 mg	Kalk 10 mg
Vítamín
A Ret. ein 299 µg	B1 - mg
B2 0.03 mg	Niacin 0.7 mg
C (askorbínsýra) 145 mg

Næringargildin hér að ofan eiga við rauðar paprikur. Örlítill munur er á milli lita en við völdum að gefa upp næringargildi vinsælasta litsins.

Paprikan er einkar rík af B- og C-vítamíni, rauð aldin innihalda þrisvar sinnum meira C-vítamín heldur en appelsínur og græn aldin tvöfalt meira. Í þeim er einnig mikið af A- vítamíni, steinefnum og trefjum. Paprika er hitaeiningasnauð. Vegna þess að græn paprika er tínd óþroskuð þá inniheldur hún minna af vítamíni en lituð paprika.

Loka glugga Senda á vin