Gulrótarsúpa

Bragðmikil og nærandi

Höfundur: Sigurveig Káradóttir

Innihaldslýsing:
  • 2-3 msk ólífuolía
  • 2-3 msk smjör
  • 200 g laukur
  • 100 g sellerí
  • 50 ml hvítvínsedik
  • 1 kg gulrætur
  • 2 msk sykur (má sleppa)
  • 1-2 tsk túrmerik
  • 2-3 hvítlauksrif
  • 1 – 1 1/2 lítri vatn/grænmetiskraftur
  • 3-4 lárviðarlauf
  • 1 búnt fersk steinselja
Leiðbeiningar:

Laukur og sellerí skorið fremur smátt og sett í pott ásamt ólífuolíu og ögn af sjávarsalti.

Leyft að glærast um stund. Á meðan eru gulræturnar skornar fremur smátt og þeim síðan bætt í pottinn ásamt smjörinu og sykri og túrmerik.

Leyft að brúnast aðeins í pottinum og taka smá lit áður en smátt söxuðum hvítlauknum er bætt saman við.

Því næst er hvítvínsedikinu hellt í pottinn og leyft að gufa aðeins upp áður en kraftinum er bætt saman við.

Látið malla á meðalhita, þar til grænmetið er fullsoðið.

Þá er steinseljunni bætt saman við, lárviðarlaufin veidd úr og súpan maukuð.

Sett aftur í pottinn, krydduð til og hituð að nýju.