Helga og Gu­jˇn

Frá því að Guðjón Birgisson og kona hans, Sigríður Helga Karlsdóttir, byggðu fyrsta gróðurhúsið árið 1980 hafa þau ræktað grænmeti á Melum á Flúðum í Hrunamannahreppi. Bæði Guðjón og Helga eru alin upp við garðyrkju og grænmetisrækt en Guðjón kynntist grænmetisræktun í Garði í sömu sveit, þangað sem hann fór í vist á hverju sumri frá 12 ára aldri.

Í dag rækta þau, í hágæða gróðurhúsum þar sem nýjustu tækni er beitt, tómata, gúrkur og papriku allt árið um kring. Á Melum eru ræktaðar 3 tegundir af tómötum; þessir hefðbundnu sem allir þekkja, litlir heilsutómatar auk gulra kirsuberjatómata. Heilsutómatarnir hafa löngum verið sérstaða á Melum og eru bragðmeiri en gömlu góðu venjulegu tómatarnir en eru líka hollari. Því í þeim er þrefalt meira magn af andoxunarefninu lýkópen sem rannsóknir benda til að hjálpi í að veita vörn gegn hjartasjúkdómum og krabbameini. Samtals er ræktað í 5000 fermetrum af upphituðum gróðurhúsum og er framleiðslan rúmlega 400 tonn á ári.

Auk gróðurhúsaræktarinnar er líka útirækt á Melum. Þar er ræktað kínakál, blómkál, brokkólí, salat, hnúðkál og fleiri tegundir. Gæði og ferskleiki eru höfð í fyrirrúmi á Melum. Þannig er öllu grænmeti handplantað og það síðan handtínt, skorið, og sérvalið í neytendapakkningar. Frá Melum fara daglega sendingar sem berast neytendum samdægurs.

Ræktunin á Melum er náttúruvæn sem felur í sér að býflugur sjá um að frjóvga plönturnar og það eru engin eiturefni notuð á grænmetið. Heldur er lífrænum vörnum beitt í baráttu við meindýr. Græn orka er í fyrirrúmi og auðlindir jarðar notaðar við garðyrkjuna. Grænmetið er meðal annars ræktað í Hekluvikri og það vökvað með ferskvatni, því sama og heimilin í Hrunamannahreppi drekka. Gróðurhúsin eru hituð upp með heitu vatni sem nóg er af í jörðu. Þá kemur kolsýran, sem nauðsynleg er við ræktunina, einnig úr jörðu og rafmagnið úr fallvötnum.

Garðyrkjubændurnir á Melum eru stoltir ræktendur og hafa í mörg ár verið með sölustand fyrir grænmetið sitt fyrir utan gróðurhúsin. Nýlega hafa þau fært út kvíarnar og sett upp á staðnum verslun, Litlu Melabúðina. Þar er til sölu ferskt grænmeti og kryddjurtir frá Melum en einnig allskyns matvara frá öðrum bændum úr héraðinu.

Smellið á myndirnar til að stækka þær og skoða betur

Senda ß vin

Loka