Heilsa og lÝfstÝll

G˙rkur

G˙rkur
Gúrkur hafa verið ræktaðar til matar um þúsundir ára og hér á Íslandi hófst ræktun þeirra snemma á síðustu öld. Þrátt fyrir það hafa Íslendingar ekki nýtt sér möguleika þessarar ágætu grænmetistegundar sem skyldi. Gúrkur hafa aðallega verið notaðar ofan á brauð eða með mat, í hefðbundin salöt og svo súrsaðar. En það er hægt að gera margt fleira við gúrkur. Í heitari löndum eru þær t.d. gjarna maukaðar eða rifnar og blandað saman við jógúrt ásamt kryddjurtum og gerðar úr þeim kaldar súpur, sósur og ídýfur. Einnig má nota þær í svaladrykki. Gúrkur eru líka víða notaðar í heita rétti sem eru þá gjarna snöggsteiktir.
 
Svo er auðvitað hægt að nota þær í alls konar salöt með fjölbreytilegu hráefni. Gúrkusalöt geta verið afar margvísleg – norðurevrópsk með ediki og dilli, Miðjarðarhafssalöt með ólífuolíu og mintu eða óreganó, líbönsk með sítrónusafa, ólífum og timjani, írönsk með jógúrt og spínati, norðurafrísk með hvítlauk og chili, indversk með karríkryddum, mexíkósk með lárperu, chili og kóríanderlaufi, karabísk með ananas og chili – þannig má halda lengi áfram. Það er hægt að skera gúrkurnar í bita, sneiðar (beint eða á ská), gorma, stauta, teninga, rífa þær gróft eða fínt, pressa úr þeim safa eða láta þær halda öllum safanum. Þær geta verið aðalhráefnið í salatinu eða með öðru og salatið getur verið léttur aðalréttur eða meðlæti. Gúrkusalöt eru oft sérlega holl og hitaeiningasnauð.
Til baka Senda ß vin

Senda ß vin

Loka