Hr÷nn og Bergur

Pétursey er  274 metra hátt móbergsfjall  sem stendur austan við Sólheimasand í Mýrdal.  Nokkrir bæir standa í nágrenni við  fjallið, einn þeirra er Vestri-Pétursey þar sem Bergur Elíasson og Hrönn Lárusdóttir búa.  Þar hafa þau  ræktað gulrætur í um tuttugu ár, byrjuðu smátt en hafa aukið ræktunina ár frá ári.  „Við ræktuðum einnig kartöflur en hættum því og snérum okkur alfarið að gulrótunum.  Jarðvegurinn er mjög góður fyrir gulrótarækt, sendinn og næringarríkur.   Gulræturnar okkar eru mjög bragðgóðar, þó þær séu ekki allar fallegar í laginu. Skýringin er oft sú á löguninni að í jarðveginum leynast  steinvölur, sem hafa áhrif á vöxtinn“, segir Bergur Elíasson bóndi í Vestri-Pétursey.   Þau Bergur og Hrönn búa einnig með kýr og eru með ferðaþjónustu.

Péturseyjarjarðir voru í landnámi Loðmundar gamla á Sólheimum. Jörðin gekk lengst af undir nafninu Ey og fjallið nefnt Eyjan há. Kirkja var lengi á jörðinni og líklega var farið að kalla fjallið Pétursey þar sem kirkjan var  helguð Pétri postula. Péturseyjarjarðir hafa alla tíð verið bændaeign og þar hefur verið margbýlt.

Bergur er uppalinn í Vestri-Pétursey og hefur ávallt átt þar lögheimili.  Fjölskyldan hans hefur búið á jörðinni frá 1806. Þau Bergur og Hrönn tóku við búi í Vestri-Pétursey árið 1987, en áður höfur þau búið þar í  félagi við bróður Bergs og einginkonu hans.

Mikil vinna er við gulrótarræktina vor og haust.  Sum árin er uppskera góð en svo getur hún brugðist ef tíðin er slæm. Þegar Eyjafjallajökull gaus árið 2010 lagðist aska yfir alla garða og gerði það að verkum að nær engin uppskera varð. Þá lá að meðaltali fjögurra sentimetra þykkt öskulag yfir görðunum og þegar rigndi ofan í öskuna varð hún eins og hálfþornuð steypa.

Vor og haust fá þau hjón hjálp frá fjölskyldunni við að sá og taka upp.  Í góðu ári getur uppskeran orðið um 80 tonn en í slæmu ári 10 tonn þannig að náttúruöflin og veðurfarið stýra  uppskerunni.

Smellið á myndirnar til að stækka þær og skoða betur

PÚtursey

Senda ß vin

Loka